Chempu
Grama Panchayat

ചരിത്രം

ഈ ഗ്രാമത്തിലെ ഭൂമിയില്‍ ഭൂരിഭാഗവും ദേവസ്വങ്ങളുടേതായിരുന്നു. മാര്‍ത്താണ്ഡവര്‍മ്മ മഹാരാജാവ് തിരുവിതാംകൂര്‍ ഭരിച്ചിരുന്ന കാലത്ത് പ്രധാന മന്ത്രിയായിരുന്ന രാമയ്യന്‍ ദളവ വള്ളിക്കുന്നിന്റെ ആസ്ഥാനമായ ബ്രഹ്മമംഗലത്ത് ഇല്ലിക്കോട്ട സ്ഥാപിച്ചു. അതിര്‍ത്തി സംരക്ഷിക്കാനും തിരുവിതാംകൂറിന്റെ സുരക്ഷ ഉറപ്പാക്കുന്നതിനുമായി നിര്‍മ്മിച്ചതാണ് ഈ കോട്ട.

ദേവസ്വം സ്വത്തുക്കള്‍ ഇടപ്രഭുക്കള്‍ക്ക് കൈമാറിയതോടെ ജന്മിമാര്‍ രൂപംകൊണ്ടു. ജന്മിത്വവും അയിത്തവും ഈ പ്രദേശത്ത് നിലനിന്നിരുന്നു. മത്സ്യം ധാരാളം ലഭിച്ചിരുന്ന ഈ പ്രദേശത്തിന് മത്സ്യത്തെ സൂചിപ്പിക്കുന്ന "ചമ്പ" എന്ന പദത്തില്‍ നിന്നാണ് ചെമ്പ് എന്ന പേര് രൂപപ്പെട്ടതെന്ന് പറയപ്പെടുന്നു. ചുവന്ന മണ്ണുള്ള ഭൂമി എന്നര്‍ഥം വരുന്ന "ചെംഭൂ" എന്ന പദത്തില്‍ നിന്നുമാണ് ഈ പേര് ഉണ്ടായതെന്ന അഭിപ്രായവുമുണ്ട്.

ചെമ്പ് കുഴിവേലില്‍ ശങ്കരപ്പണിക്കര്‍ ഈ പ്രദേശത്തെ ഖാദി പ്രചാരകനായിരുന്നു. വിദ്വാന്‍ എന്‍.പി. പണിക്കര്‍ പ്രമുഖ ഹിന്ദി പ്രചാരകനുമായിരുന്നു.

1948-ല്‍ രൂപം കൊണ്ട പഞ്ചായത്ത് ഗ്രന്ഥശാലയാണ് ഈ പഞ്ചായത്തിലെ ആദ്യത്തെ ഗ്രന്ഥശാല. വൈക്കം–എറണാകുളം റോഡാണ് ഈ പഞ്ചായത്തിലൂടെ നിര്‍മ്മിക്കപ്പെട്ട ആദ്യത്തെ പ്രധാന റോഡ്.

ബ്രഹ്മമംഗലത്തുള്ള ഇല്ലിക്കോട്ട, കൊച്ചി രാജ്യവുമായുള്ള അതിര്‍ത്തി തിരിക്കുവാനും തിരുവിതാംകൂറിന്റെ സംരക്ഷണത്തിനുമായി സ്ഥാപിക്കപ്പെട്ട പ്രധാന കോട്ടകളിലൊന്നാണ്.

സ്വാതന്ത്ര്യാനന്തര കാലഘട്ടത്തില്‍ കേരളത്തില്‍ ഉണ്ടായ നവോത്ഥാനത്തിന്റെ അലയൊലികള്‍ ചെമ്പിലും എത്തിച്ചേര്‍ന്നു. സാമൂഹിക, സാംസ്കാരിക, വിദ്യാഭ്യാസ മേഖലകളിലെ പുരോഗതിയിലൂടെ പഞ്ചായത്ത് വികസനത്തിന്റെ പുതിയ ഘട്ടങ്ങളിലേക്ക് മുന്നേറി.